नवी दिल्ली : अफगाणिस्तानविरुद्ध होणाऱ्या तीन सामन्यांच्या T20 आंतरराष्ट्रीय मालिकेसाठी भारतीय संघाची घोषणा करण्यात आली आहे. युवा फलंदाज वैभव सूर्यवंशी याचा संघात समावेश करण्यात आला असून, वेगवान गोलंदाज जसप्रीत बुमराह याचेही संघात पुनरागमन झाले आहे. मात्र बुमराहसह काही खेळाडूंचा अंतिम सहभाग फिटनेस मंजुरीवर अवलंबून आहे.
या मालिकेसाठी श्रेयस अय्यरकडे भारतीय संघाचे नेतृत्व सोपवण्यात आले असून तिलक वर्माची उपकर्णधारपदी निवड झाली आहे. याशिवाय संजू सॅमसनचेही संघात पुनरागमन झाले आहे.
वैभव सूर्यवंशीवर पुन्हा विश्वास
अवघ्या १५ वर्षांच्या वैभव सूर्यवंशीने अलीकडील झिम्बाब्वेविरुद्धच्या T20 मालिकेत दमदार कामगिरी करत निवड समितीचे लक्ष वेधले होते. तीन सामन्यांत त्याने १५१ धावा करत मालिकेत भारताकडून सर्वाधिक धावा केल्या. त्याचा स्ट्राईक रेट तब्बल १९६.१० इतका होता.
इंग्लंड दौऱ्यातील निराशाजनक सुरुवातीनंतर झिम्बाब्वेविरुद्ध त्याने दोन अर्धशतके झळकावत शानदार पुनरागमन केले. त्यामुळे अफगाणिस्तानविरुद्धच्या मालिकेत त्याच्याकडून मोठ्या अपेक्षा आहेत.
बुमराह, सुंदर, नितीश आणि हर्षित यांच्या फिटनेसकडे लक्ष
जसप्रीत बुमराह, नितीश कुमार रेड्डी, वॉशिंग्टन सुंदर आणि हर्षित राणा यांची संघात निवड झाली असली तरी त्यांचा अंतिम सहभाग फिटनेस क्लिअरन्सवर अवलंबून आहे.
दरम्यान, हार्दिक पांड्याला संघात स्थान मिळालेले नाही. सूर्यकुमार यादवही या मालिकेसाठी संघाबाहेर आहे.
भारत-अफगाणिस्तान T20 मालिकेचे वेळापत्रक
भारत आणि अफगाणिस्तान यांच्यात तीन T20 सामने खेळवले जाणार आहेत. तिन्ही सामने नवी दिल्लीतील अरुण जेटली स्टेडियमवर होणार आहेत.
- पहिला T20: १३ सप्टेंबर २०२६
- दुसरा T20: १५ सप्टेंबर २०२६
- तिसरा T20: १७ सप्टेंबर २०२६
टीम इंडियाचा १५ सदस्यीय संघ
श्रेयस अय्यर (कर्णधार), अभिषेक शर्मा, वैभव सूर्यवंशी, संजू सॅमसन, ईशान किशन, तिलक वर्मा (उपकर्णधार), शिवम दुबे, नितीश कुमार रेड्डी, अक्षर पटेल, वॉशिंग्टन सुंदर, वरुण चक्रवर्ती, रवी बिश्नोई, जसप्रीत बुमराह, अर्शदीप सिंग आणि हर्षित राणा.
विशेष: या मालिकेनंतर याच संघातून भारताचे आशियाई क्रीडा स्पर्धेतील प्रतिनिधित्वही होणार आहे.
0 टिप्पण्या